ඔබ දැනට ව්‍යායාම නොකරන්නේ නම්, එසේ කිරීමට හේතු මොනවාද? ඇතැම්විට එය, ව්‍යායාම කිරීම සඳහා ඔබට කාලය මදවීම, ප්‍රමාණවත් ශක්තියක් නොමැතිවීම, හෝ ඔබ ව්‍යායාම පිළිකුල් කිරීම වැනි හේතුවක් වියහැක. නොකෙරෙන ව්‍යායාම සඳහා හේතුවක් කෙසේ හෝ සොයාගැනීමට අප සැබැවින්ම දක්ෂය. නමුත්, බොහොමයක් හේතු සඳහා පිළියම් ඇත. එමනිසා, ව්‍යායාම කිරීම සඳහා උත්තේජනයක් ලබාගැනීමට එවැනි පිළියම් යෙදීම වඩාත් උචිත වේ. එබැවින්, නොකෙරෙන ව්‍යායාම සඳහා බහුලව ඉදිරිපත් කරන හේතු කිහිපයක් සහ ඒවාට ඇති පිළියම් වෙන් වෙන් වශයෙන් සාකච්ඡා කර බලමු.
“ව්‍යායාම කරන්න වෙලාවක් නැහැ”
ඔබ දිනකට කොපමණ වෙලාවක් රූපවාහිනිය නරඹනවාදැයි මදක් සිතා බලන්න. කෙසේ වුවත්, ඔබ වැඩියෙන්ම කැමති වැඩසටහන් නැරඹීම නවතා දැමීම අත්‍යාවශ්‍ය නොවේ. ඔබ කලයුත්තේ, වාඩිවී රූපවාහිනිය නැරඹීම වෙනුවට, රූපවාහිනිය නරඹමින්ම එකතැන ඇවිදීමය. එවිට, ව්‍යායාම කිරීම මෙන්ම, ඔබගේ ප්‍රියතම වැඩසටහන නැරඹීමද එකවර කලහැක. එකතැන ඇවිදීම වෙනුවට ශක්ති වර්ධන ව්‍යායාම (Strength training) වර්ගයක් වන ප්‍රතිරෝධ පටි (Resistance bands) යොදාගන්නා ව්‍යායාමද රූපවාහිනිය නරඹමින් කලහැක. හැකිනම්, ඔබගේ ප්‍රියතම වැඩසටහන් පටිගත කිරීමෙන් අනතුරුව, වෙළඳ දැන්වීම් ඉවත්කර පසුව නරඹන්න. එහිදී ඉතිරිවන කාලය ව්‍යායාම සඳහා වෙන්කල හැක. ඔබට දිගු වේලාවක් එකදිගට ව්‍යායාම කිරීම සඳහා කාලය වෙන්කල නොහැකි නම්, ඔබගේ ව්‍යායාම වැඩසටහන කුඩා කාල පරාස කිහිපයකට වෙන්කර, දවසේ පහසු වේලාවල් වලදී කරන්න. කිසිඳු ක්‍රියාකාරකමක් නොකිරීමට වඩා කුමන ආකාරයකට හෝ ශාරීරික ක්‍රියාකාරකමක් සිදුකිරීම වැදගත් බව සලකන්න.
“ගොඩක් මහන්සියි”
සැබැවින්ම, ව්‍යායාම මගින් ඔබට අමතර ශක්තියක් ලැබෙන බව වටහාගන්න. ව්‍යායාම කරන විට, ශරීරයට පහසුවක් සහ ශක්තිමත් බවක් දනවන එන්ඩෝෆින් (Endorphins) නම් වූ හෝමෝන ශ්‍රාවය වන අතර, ශරීරයේ රුධිර සංසරණයද වැඩිදියුණු වේ. මෙවැනි ප්‍රතිලාභ මගින්, දවස අවසන් වනවිට ව්‍යායාම කිරීම වෙනුවට උදෑසනම ව්‍යායාම කිරීමට පෙළඹවීමක් ඇතිවේ. ඔබට උදෑසන අවදිවීම ගැටළුවක් නම්, ඔබට පහසුවක් දැනෙන ඕනෑම වේලාවක් තෝරාගැනීමේ ගැටළුවක් නැත.
“ළමයින්ගෙ වැඩ නිසා බෑ”
ඔබේ දරුවන්ද ශාරීරික ක්‍රියාකාරකම් වල යෙදිය යුතුබව සිතට ගන්න. එමනිසා, දිනපතා ළමයින්ට සෙල්ලම් කිරීමට කාලයක් ලබාදෙන්න. ඔබේ දරුවන් සෙල්ලම් කරන අතරතුර, අවට වේගයෙන් ඇවිදින්න ඔබට පුලුවන්. නැතහොත්, ඔවුන් ක්‍රීඩා කරන අසලට වී ලණු පැනීම (Skipping rope) වැනි ක්‍රියාකාරකමක් කිරීමටත් ඔබට හැකියාව තිබේ.
දරුවන් සමග බයිසිකල් පැදීම, බැඩ්මින්ටන් ක්‍රීඩා කිරීම, දිවීම, ඇවිදීම වැනි ක්‍රියාකාරකම් කිරීමද ඔබට කලහැකි තෝරාගැනීම් ලෙස දැක්විය හැක. අවට පරිසරයේ කාලගුණය අයහපත් නම්, ගීතයක් වාදනය වීමට සලස්වමින් දරුවන් සමග නර්තනයක යෙදීමද කලහැක. මේ සඳහා නර්තනය හැදෑරීම අත්‍යාවශ්‍ය නොවේ. සැබැවින්ම අවශ්‍ය වන්නේ සක්‍රීයව චලනය වීම පමණි. පවුලේ මව සහ පියා යන දෙදෙනාම මනා ශාරීරික යෝග්‍යතවයකින් පසුවීම නිසා ප්‍රතිලාභ ලැබෙන්නේ මුළු පවුලටම බව සිතට ගන්න.
“ව්‍යායාම කිරීම හරිම නීරසයි”
ඔබ වඩාත් ඇලුම්කරන ශාරීරික ක්‍රියාකාරකමක් සොයාගන්න. නර්තනය, ගෙවතු වගාව, බයිසිකල් පැදීම, ඇවිදීම, දිවීම, පිහිනීම, ලණු පැනීම, බැඩ්මින්ටන් සෙල්ලම් කිරීම වැනි ශාරීරික ක්‍රියාකාරකම් සිය ගණනක් අතරින් ඔබ කැමතිම ක්‍රියාකාරකමක් තිබිය හැක. එය සොයාගන්න. “ඕනෑම අයෙකුට ව්‍යායාමයක් ඇත” යන සංකල්පය සිතට ගන්න. එවන් ශාරීරික ක්‍රියාකාරකමක් තෝරාගත් විට, ව්‍යායාම කිරීම බාරදූර, අප්‍රසන්න කාර්යයක් ලෙස ඔබට නොවැටහෙනු ඇත. ඔබ විනෝදයෙන් ඔබේ ශාරීරික ක්‍රියාකාරකම කරනවා නම්, ව්‍යායාම කරන බයිසිකලයක් පදිමින් හෝ ව්‍යායාම ධාවන පටියක (Treadmill) ඇවිදිමින්, පොතක් කියවීම හෝ රූපවාහිනිය නැරඹීම සිදුකලාට කම් නැත. එමෙන්ම, ව්‍යායාම කිරීම සඳහා මිතුරන් කිහිප දෙනෙක් එකතුකර ගන්න. යම්කිසි කාලයකට අනතුරුව, සම්පූර්ණයෙන්ම වෙනස් ශාරීරික ක්‍රියාකාරකමකට යොමුවීමෙන්, ව්‍යායාම කිරීම නීරසවීම අවම වනු ඇත. එසේම, සතිය පුරා ව්‍යායාම මිශ්‍රණයක් කිරීමෙන්ද, ව්‍යායාම කිරීමට ඇති නීරසභාවය තුරන් වනු ඇත.
“ඇඟ හොලවන්න කම්මැලියි”
ඔබට ඇඟ සෙලවීමට මැලිකමක් ඇතිවන්නේ ඇයි දැයි මදක් සිතන්න. ඇතැම්විට, ඔබ දහඩිය දමනවාට අකමැති කෙනෙකු වියහැක. එසේනම්, ඔබට ශාරීරික ක්‍රියාකාරකමක් ලෙස පිහිනීම තෝරාගත හැක. නැතහොත්, හැකිනම්, වායුසමනය කල කාමරයක හෝ ව්‍යායාම ශාලාවක (Gymnasium) ව්‍යායාම කලහැක. ඔබට දහඩිය දැමීම අඩු යෝග වැනි ව්‍යායාම සඳහා යොමුවීමද කලහැක.
ඔබ ව්‍යායාම නොකරන්නේ සන්ධිවල වේදනාව සහ තද ස්වභාවය නිසා නම්, ඔබට උචිතම ශාරීරික ක්‍රියාකාරකම වන්නේ පිහිනීමය. මක්නිසාද, පිහිනීම මගින් ඔබේ සන්ධි මත ඇතිවන පීඩනය අවම වේ. එපමණක් නොව, පිහිනීම මගින් ඔබගේ මාංශ පේශි ශක්තිමත් වන අතර, ජලය ඔබේ සන්ධි වලට ආධාරකයක් සේ ක්‍රියාකරන බැවින් සන්ධි වල වේදනාව ඇතිවීමද අවම වේ. ඔබගේ සන්ධි ආශ්‍රිත ගැටළු බලවත් නම්, වෛද්‍ය ප්‍රතිකාර සඳහා යොමුවන්න. එවිට, වෛද්‍ය උපදෙස් මත ඔබේ සන්ධි වලට ආරක්ෂිත සහ පහසු ව්‍යායාම සඳහා යොමුවිය හැක.
ඔබ ඔබේ බර ගැන සැලකිලිමත් නම්, යහළුවන් සමග ඇවිදීම, තනිව නිවසේ ව්‍යායාම කිරීම, හෝ ව්‍යායාම උපදේශකයෙකු යටතේ ව්‍යායාම වැඩසටහනකට සහභාගීවීම වැනි විකල්ප වලට යොමුවිය හැක. සැමවිටම, ව්‍යායාම කිරීමේදී ඇඟට පහසු ඇඳුම් පැලඳුම් භාවිතාකිරීමට කටයුතු කරන්න.
“කලින් කලා, වැඩක් වුනේ නැහැ”
ව්‍යායාම කිරීමේදී ඇතිකරගන්නා ඉලක්ක කුඩා මෙන්ම, ප්‍රායෝගිකව අත්කර ගැනීමට පහසු ඒවා විය යුතුය. එවිට, සාර්ථකත්වය පිළිබඳ හැඟීමක් ඇතිකර ගැනීම වඩාත් පහසු වන අතර, අසාර්ථක වීමට ඇති හැකියාව අවම වේ. ඔබේ සාර්ථකත්වය සටහන් කරගැනීමද පහසු වේ. එය, ඔබ උනන්දු කරවන බිත්ති පුවරුවක් වනු ඇත. ඔබේ මිතුරන්ගේ සහ ඥාතීන්ගේ ප්‍රශංසා ඔබව තවත් උනන්දු කරවනු ඇත. ඔබ ඉලක්කයන් එකින් එක අත්කරගන්නා බව සටහන් කරගත් විට ඔබ අසාර්ථක බව කිසිවිටෙක නොහැඟෙනු ඇත. හැකි සෑමවිටම, ව්‍යායාම කිරීමට සගයෙකු තබාගැනීමට කටයුතු කරන්න. එය, ඔබේ උද්‍යෝගීමත්භාවය රඳවන සාධකයක් වනු ඇත. ව්‍යායාම කිරීම සඳහා ඔබව බලාපොරොත්තුවෙන් යමෙක් සිටින බව සිතේ පවතින තුරු, ඔබ ව්‍යායාම වලින් ඈත් නොවනු ඇත.
(ඡායාරූප අනුග්‍රහය: islandjoe)
සබැඳි ලිපි:
දිනපතා ව්‍යායාම කිරීම වැදගත් වන්නේ ඇයි?
සෞඛ්‍ය සම්පන්නව ව්‍යායාම කරන්නේ කොහොමද?
ව්‍යායාම වැඩසටහනක ප්‍රතිඵල නැතිකරන වැරදි 11 ක්
පිහිනීම නිසා ඔබේ සෞඛ්‍යයට ඇතිවන වාසි
© 2017 – 2020, සුව සෙවන. සියලු හිමිකම් ඇවිරිණි.
පළමුවෙන්ම ඔබේ අදහස දක්වන්න. "නොකෙරෙන ව්‍යායාම සඳහා ඇති හේතු පරදවන්නේ කෙසේද?" පිළිබඳ ඔබේ අදහස්